Act 5 | KMG | STEP | Eme ŋic moc juwec šâŋene Anania, e ŋonâŋ-ticne Safira ehec muc manac ehuc hae mâreŋ-ticne qikiŋneme moneŋ fua-jacteme

Acts 5

Anania â Safira jahere binaŋ

1 Eme ŋic moc juwec šâŋene Anania, e ŋonâŋ-ticne Safira ehec muc manac ehuc hae mâreŋ-ticne qikiŋneme moneŋ fua-jacteme 2 mamanac erâ tucne hefackepire fojactewec â tucne sawa ŋiczi aposolo jaŋerao râewec. 3 Râeme Petorozi šiŋuc âzâcnewec: “Anania, go wemocte Sataŋzi maŋge bâsifuckeme Tiri Mâro eatuckehuc hae mâreŋgere furi tucne hefackekomec? 4 Hae mâreŋge fogarezo murâ fogarezac, me qikiŋnerâ furine moneŋ rorâ izi iŋuc me iŋuc ezo murâ enšaŋ. Go weniŋuc erâ maŋgezi surucgume iŋuc emec? Go ŋic nâŋe mâcne, go Anutu eatuckekomec.” 5 Iŋuc mume Anania e dâŋ mana manahuc rândiŋke qarâ hâmowec. Eme hone manac embiŋ jaŋe hâhâwic sâko fua-jarewec. 6 Eme ŋicmotec domambiŋ jaŋe qâŋɋâŋ-ticne qoruczi râpâckerâ bara duckembiŋ.

7 Eme aua 3 tarame ŋonâŋ-ticne biŋe mi mamana, mâc fokac muhuc fisiwec. 8 Fisime Petorozi šiŋuc wiocnewec: “Hae mâreŋte furine ine mac hâcne warejec?” Eme eki muwec, “Ine mac sawa hâcne.” 9 Mume Petorozi šiŋuc âzâcnewec: Ŋohe wemocte Wofuŋte Mâro eatuckenicte mamanac epirec? Manakic, ŋowege duckembieŋ motâc râpeo domaŋgopieŋ, jaŋe go iŋuc jaha bacgu ra ducguniŋmu.” 10 Iŋuc mume izia kikefuŋnao rândiŋke qarâ hâmowec. Eme ŋicmotec jaŋe ficmaŋko ferâ qâŋɋâŋ-ticne honerâ bara ŋowe-ticne duckembiŋko ijaha duckembiŋ. 11 Eme opâ ruac guru â ŋic gâcne biŋe-jekic manambiŋ jaŋerao hâhâwic sâko fuawec.

Aposolo jaŋe mâsi fuŋne fuŋne bambiŋ

12 Aposolo jaŋe mâsi fuŋne fuŋne bocjaha ŋic jaŋerao bambiŋ. Eme Jesure kikefuŋ jaŋe taha ufuŋ maŋne moc šâŋene Salomo ira maŋ mocjaha erâ tumaŋne jumbieŋ. 13 Tumaŋnehapie ŋic gâcnezi araŋ bajarehuc enšaŋauc kosa mi ejare jumbieŋ. Jaŋe opâ ruac jaŋere manapie bipinehec ewec. 14 Erâ ŋic â ŋokac gurune gurune miti mana šakiehuc Wofuŋtao šuhucke jumbieŋ. 15 Erâ wâc âgofâc-jeŋic huc šâichec hatao fofo â kanše faio kecšiŋuc muhuc râec-jopambiŋ: Petorozi rac warec eme nâkumuc-ticnezi foninipec-jopazejec. 16 Erâ Jerusalem hae rârec rârec ŋic jurambiŋ jaŋe orâŋ bârâŋ fisihuc jumbiŋ. Ehuc huchec â demoŋhecfâc-jeŋic mâmâc amec-jopa fisipie biaŋke-fârembiŋ.

Aŋelozi aposolo kâpâcwâru fickonec batarac-jopawec

17 Eme wiac iŋucne fuame taha bapa sâko e â qaŋeŋfâc-ticne, sadukaio ŋic hâcne, jaŋe maŋzi ruc bahuc 18 aposolo mana sâqore-jarerâ rocjoparâ kâpâcwâru fic sâkoo râec-jopambiŋ. 19 Eme ira fohapie ŋafeo Wofuŋte aŋelozi motâc rojarerâ jowac-jopa hurâ šiŋuc jazawec: 20 “Ŋoŋe taha ufuŋko ferâ ŋic sasawa juju hata kecširec biŋedâŋ jazahuc domanšepieŋ.” 21 Iŋuc jazame jaŋe manarâ furicte taha ufuŋko ferâ miti mumbiŋ. Ehame taha bapa sâko e â qaŋeŋfâcne jaŋe qâturerâ ŋic fekicne â Israe ŋic micne guru-jeŋic hefârec-jopapie furu fisimbiŋ. Erâ polismaî jaŋe kâpâcwâru ficko ra aposolo rocjopapie fisiniŋte mumbiŋ. 22 Eme polismaî jaŋe ra kâpâcwâru ficko basac-joparâ risierâ mumbiŋ, 23 “Nâŋe ra fisirâ motâc kine sanaŋne bakicne honembeneŋ, erâ soŋaŋ jaŋe motâcko domambieŋ wâc. Erâ motâc rorâ ferâ ŋic ine basac-jopambeneŋ.” 24 Dâŋ i mupie ufuŋte polismaî micne â taha bapa micne jaŋe manapie quŋkewec. 25 Ehapie ŋic moczi fisirâ muwec, “Manaŋgopieŋ, kâpâcwâru ficko râec-jopambieŋ jaŋe ufuŋko ŋic miti jazahuc domaŋgopieŋ.” 26 Mume polismaî micne eki soŋaŋfâcne rocjopame ra aposolo urucko jowac-jopa warembiŋ. Ŋic jaŋe qânâzi hecjopanšipiŋte hâwic-jopame wânšâŋnehec šame kirac mi ejarembiŋ.

Aposolo jaŋe micne bapa tutumaŋko dâŋ hâhâwic tâmiric mumbiŋ

27 Eme micne bapa tutumaŋko râec-jopapie domahapie taha bapa sâkozi dâŋ šiŋuc jazawec: 28 “Nâŋe ŋic hâcne šâŋe biŋe-ticne mi mupie haŋ baocte mic muac mi eŋarembeŋ me? Eme ŋoŋe sifu dâŋ i Jerusalem haeo mocwâc muiŋneŋgopieŋ, ehuc ŋic hâcne ere kiŋ nâŋere faio râezo muŋgopieŋ.” 29 Mume Petoro â aposolo gâcne jaŋe dâŋ šiŋuc bâtikiecnembiŋ: “Ŋicdâŋ reŋkehuc Anuture dâŋ qiqikiŋ i mi fokac. 30 Ŋoŋe Jesu maripoŋko qarâ qâhâmopie mimiŋnefâc-nâŋec jaŋere Anutuzi bâɋâreme faharewec. 31 Fahareme Anutuzi e jahacne mefâreo râerâ micne sâko â bâbâpiaŋ-nâŋec âkendâŋnewec. Eme ši Israe ŋic ŋoŋe maŋŋeŋic bârisiepie sâqocne-ŋeŋic šureocte muekac. 32 Eme irec biŋe hâcne Tiri Mâro â nâŋe mueŋgopeneŋ. Tiri Mâro e Anutuzi micrereŋfâc-ticne jareekac.” 33 Dâŋ iŋuc jazame bujeŋic henšaŋneme mana hâtâwerâ aposolo jopaniŋte mumbiŋ.

Farisaio ŋic moczi âgofâcne mu bâmâteŋ ejarewec

34 Eme tutumaŋ-jeŋicko farisaio ŋic moc ŋewec, šâŋene Gamalie, e sâcmutâc dâŋ qaqazu-jeŋic fekicne. Eki hâcne mume aposolo jaŋe hae šoŋao hurâ juhapie 35 micne bapa âgofâcne šiŋuc jazawec: “Israe ŋicbureŋ, ŋoŋe ŋic i wiac mana wosâehuc ejarenšepieŋ. 36 Mârâc ŋic moc šâŋene Teuda eki, no ŋicbomboŋ micne-ŋeŋic, iŋuc mume ŋic 400 erao qohotambiŋ. Eme e jahacne šika kime ŋicfâc-ticne tâtiepie gie-jeŋic omatac fuawec. 37 Erâ šâhec Galilaia mâreŋko ŋic moc šâŋene Juda, e wose qâreŋ enârembiŋ dameŋ ira ŋic gâcne qafeŋ-jopame bâjâpembiŋ. Eme e jahacne qahuc ŋicfâc-ticne jopa qâtâtiec ejarembiŋ. 38 Irec ši dâŋ ŋazape mananiŋ: ŋoŋe ŋic ši behec-jopapie juniŋ. Jaŋe dâŋ â gie i maŋjeŋicte mu bac eeŋgopieŋko sifuckerâ arictac eocmu. 39 Me Anutuzi neŋgoc ŋesiŋ ejarehame mu bac eeŋgopieŋko bâipiec-jopaniŋmu. Ŋoŋe gie-jeŋic ima bahuc Anutu e jahacne râsi ecnenšipiŋkohec.”

Aposolo jaŋe kâcbiŋ kimbiŋ

40 Iŋuc jazame jaŋe manapie sâckeme aposolo ejarepie tutumaŋko fepie kâcbiŋzi jopambiŋ. Joparâ ŋic Jesure šâŋe biŋe mi jazaniŋte muac-joparâ sorec-jopambiŋ. 41 Sorec-jopapie Wofuŋ e jaŋere maname sâckeha šâŋe-ticnere erâ šika kimbiŋte bubiaŋ manahuc ŋic tutumaŋkonec waharâ rambiŋ. 42 Erâ šoaŋne šoaŋne taha ufuŋko â ŋicficko Jesu Kristo ere Biŋebiaŋ jaza qazuc erâ mi behembiŋ.